ڕێوار ئاودانان
نەورووز ساڵ ٢٧٢۴ کوردی (١۴٠٣ خورشیدی) لە گشت گەل کورد، وەتایبەت کرماشان پاوەگەزدەر و ئیلام سەربەرز پیرووز و بمارک بوو. بێ گومان، نەورووز ئمساڵ بییە وە نەورووز ئاخێز و ژیانەوەێ کرماشان و ئیلام. ئەژ گیەڵان و شاباد و داڵاهوو و سەرپێڵ تا کارەزان و ئەێوان و ئاودانان و مەڵکشایی، مەراسم ئەوکردن ئاگر و جەژن نەورووز ڤە شێواز جەماوەری و فرە شکوومەندێگ ئەوڕێ چی. کەڵهوڕ و گووران و فەیلی و لەک و و لوڕ شان‌وەشان یەکتری ئەژ گەورا تا بیچگ و ئەژ ژن و پیا تا مناڵ و زاڕوو، ڤە ڕەنگینترین شێواز، خاونداری ژە نەورووز کوردانەێ خوەێیان کردن. دیار بی ک نەورووز و پاوەگەزدان و ناسنامەێ کورد ئازاد چ ڕەنگامەێ شاد و پڕ ماناێگ دێرن. بانانمان لە ئمڕوو و دە ڕووژناێ ئاگر نەورووز، هاتە دی.
هەرچەن رژیم و دەسڵاتخوازەیل، هەمیشە تواسنە ک فەرهەنگ و ئرادەێ گەل کرماشان و ئیلام بتاونن و ژە ناو بووەن، بەڵام دیار بۊ ک ئی خێیاڵ و ئارمانجێیانە سەر نەگرتێیە و سەر نیەگرێ. هەرچەن حزبەیل و لایەنەیل سیاسیی کورد لە ساڵان وەرین، هەڵەێ فرە کردنە و بایەخ وە کرماشان و ئیلام نەدانە، بەڵام خەڵک کورد لە ئیلام و کرماشان دە ئی نەورووزە، هاز و ئرادەێ سیاسی و ناسنامەێ فەرهەنگیی خوەێ وە هەرکەس نیشان دا.
بێگومان هۊچ لایەن و حزبێگ حەق نەێرێ خوەێ وە خاون ئی ئاخێز شکوومەند گەل کرماشان و ئیلامە بزانێ و بایس ئرادەێ خەڵکەگە وە ناو خوەێ قورخ نەکەێ. چۆن ک خەڵک کرماشان و ئیلام بێ یەک پشت وە هیچ لایەنێگ سیاسی بووەسێ، خوەێ ڕەسانێیە وە ئی ئاست بەرز ناسنامەخوازی و ئرادەێ ئازادە. ئی حەقیقەتە هەم دە جمشت “ژن ژیان ئازادی” وە چەو دیمن و هەم دە جەژن نەورووز ئمساڵ.
ناسیۆناڵیزم ناوچەگەرا، مەزهەبگەرا و دماکەفتەێ کوردی، لە دیرووک نزیک وە سەد ساڵەێ خوەێ، نە هاز ڕێخستنەوەێ ئیلام و کرماشان داشتێیە، نە بڕشت و ئرادەێ ئی کارە داشتێیە و نە خوازیار ئی کار بییە. کورد ئیلام و کرماشان، نە تەسلیم سیاسەتەل ناوەندگەرایانەێ ڕژیم ئێران بییە، نە وە سیاسەتەل و شۆعارەل هەڵە و کوشندەێ سازمانەل دماکەفتەێ کوردی ئەڵخڵەتیاێە. ئەڕا یەسە ک ئمڕوو دۊنێمن ک گەل کورد دە کرماشان و ئیلام بێ یە ک پشت وە ئی سازمانەیل و حزبەیلە بووەسێ، وە شێواز خوەێ‌ڕەوز، وژ ڕەسانێیە وە ئی ئاست بەرز زانابۊن سیاسی و فەرهەنگییە. ئەڕا یە حەقە ک دەسخوەشی و پیرووزبایی وە خەڵک کوردەوار و شەریف ئیلام و کرماشان بکەیمن و بیشیمن ک “ئێوە دەرس خەبات و کوردایەتی و پێشەنگایەتی وە گشت کەسێ دان، سەربەرز بمینن و سەرکەفتن و نەورووز شایان ئێوەس”. ئاوەختم یەسە کە هەر ڕووژتان نەورووز ئازادی و سەرکەفتن بوو.
هنوز نظری ثبت نشده است. شما اولین نظر را بنویسید.