وتووێژ وەگەرد ڕێوار ئاودانان
پرسیار: فرەتر بیێن بڕین حوکم و جێ وەجێ کردن حوکمەیل، وە تایوەت ئێعدام، چ پەیامێگ لە لایەن دەسەلات دەیدە کوومەڵگە؟
ڕێوار ئاودانان : ڕژیم کوومار ئسڵامی ئێران دە سیاسەت دەرەکیی خوەێ دژمنەل فرەێ دێرێ: ئسراییل، ئامریکا، ناتۆ، ترکیە، بڕ فرەێ ئەژ ڤڵاتەل عەرەبی. ئێران ڤەگەرد یانە ها ناو جەنگ و کێشمەکێش فرە قورسێ. زەربە دایە ئەڵ یانە و زەربەێ فرەیش خواردێیە. ئڵاڵە ک ڤەی دما، سەنگەر نوواین خوەێ یانێ سووریە ئەژ دەس دا. دیارە ئی جەنگ و کێشمەکێشە ڤەی زیا ڤە کووتایی نەێڕەسێ.
ئەما کوومار ئسڵامی دژمن گەپترێ دێرێ؛ ئەڤیش ملەتەیل یا گەلان ناو خود ئێرانن ک دە جمشت «ژن ژیان ئازادی» فرە ئاشکرا ڤتن ک ئێ ڕژیمە نەێخوازن چۆن دیکتاتورە و ڕێی هناس و ژیان خەڵک بڕییە. ڤەسنگ یە مەردم ڕێیی خوەیان ئەژ ئی حکوومەتە جگا کردنە. ئمکە حکوومەت خوازێ، دژمن ناو وڵات بێدەنگ بکەرێ تا دە جەنگ و مامڵەێ سیاسیێ ک ڤەگەرد دەرەوە کەرێ خوەێ ئازدار و ڤەهاز نشان بێ.
ڤە ئی حۆکمەیل نائنسانی ئێعدامە خوازێ ئی پەیامە بێ ڤە گەل کورد و گەلان ترەک ئێران ک: دە ڤراوەر م ملکەچ بوون، دەس ئەژ ئازادیخوازی و دمۆکراسیخوازی و ناڕزایی ئەڵبگرن، تا م ڤە دڵ خوەم ڤەگەرد دژمنەل دەرەکییم جەنگ بکەرم یا ڤەگەردۆ سازش و مامڵە بکەرم. دە ئی سیاسەت جەنگ و سازشە هیچ نووڕین کوومەڵگە یا سوود و زیان مەردم ڤەر حکوومەت گرینگ و بایەخدار نییە. دیارە جمهووریی ئسڵامی هەم دە دەوران بەرجام و ئمکەیش دە دەوران سەرکووماریی پزشکیان نشان دا ک ئامادەێ ملکەچ بیین دە ڤەراوەر ئامریکاو.
حکوومت ئێران دە ڤەردەم ئامریکا ئامادەو ملکەچ بوو، ئەما ڤەگەرد کوومەڵگەێ ئێران تەنیا و تەنیا ڤە زوان هڕەشە و هێرش قسە کەرێ.
ئی زندانی کردن و حۆکمەل ئێعدامە ئەڕا یەسەن ک کوومەڵگە دەی هەنەسا ک جەنگ چارەنڤیسسازێ دە مەنتەقە کەفتێیە ئەوڕێ، ئڕادەێ سڕ بوو و رژیم هەر بڕیارێ ڤەر ڤڵات گرت بێ ئیلا و ئەولا ملکەچێ بوو.
ئتفاقەن ئێمکە ک ئاگر جەنگ فرە گەپێ دە جەهان و مەنتەقەکەمان ئەڵگریسایە کوومەڵگە گرەکە ئەژ هەر ڤەخت فرەتر ڤریا بوو و دەناو مەیدان بوو. چۆن ک چارەنڤیسمان دە ئی جەنگە دیار دوو.
ئەما کوومار ئسڵامی خوازێ مەردم ئرادەێ خوەیان تەسلیم بکەرن، بێدەنگ بمینن و هەرچی ڤەسەرێیان هات ڕازی بوون.
رژیم ڤە زندان و شکەنجە و ئێعدام خوازێ ڤیر و فکر مەردم بتەزنێ، گەل بترسنێ و کوومار ئسڵامی دماێ ئی جەنگە ملهوڕتر ئەژ هەمیشە بتۊنێ ڤەسەرپا بمینێ.
پرسیار: ئیجوور ڕویکردێگ تا چەنێگ توانێد وە جوور ئەبزارێگ ئەڕا سەرکوت ناڕەزاییەگان و هیشتن دەسەڵات کارایی داشتوید؟
ڕێوار ئاودانان : ڕژیم ئسڵامی ئێران زیتریش ڤە گرتن و شکەنجە و ئێعدام خوەسێیە ئرادەێ ئیمەێ کورد بشکنێ، ئەما ئی کارە هۊچ دەسکەفتێ ئەڕاێ ناشت. تەنیا تین و هاز ئێمە ڤەر خەبات و مۆبارزە فرەتر بییە. مەگەر ڕژیم ئێقە ئنسان بێتاوان لە جمشت «ژن ژیان ئازادی» کوشت و بریندار کرد، ئایا داخواز ئازادی دە دڵ مەردم کوشت؟ نە، نفرەت خەڵک کورد و خەڵکەیل ترەک ئێران لە رژیم فرەترەو کرد.
ناڕزایی گەل ئەژ حکوومەت ڤەسنگ حەقەیل گەپێ جوور ڤەدەس ئاوردن ئازادی و عەداڵەت و یەکسانییە، ئەڕا ئازادی ژن، حەق پەروەردە ڤە زوان داڵکی، دمۆکراسی، بنبڕکردن ژاری و لابردن دۊچەۊەکی و بەشداریی چالاکانە دەناو ئەۊڕێبردن سیاسیی ڤڵاتە، یانە چشتەل بیچگێ نیین ک مەردم هەنێ ڤە سەرکوت و فشار ڕیڤەڕی بوون ئەژ ڤیرۆ بچوو و دەس ئەڵگرن.
کوومار ئسڵامی ئێران تا ڤەختێ دیکتاتور و ستەمکار بوو، ڕێی هەێڤاین ئەژ دەس گەل کورد و گەلان ترەک ئێران نەێرێد. تەنیا یەک ڕێ دێرێ ئەڤیش یەسە ک تەسلیم ئرادە و داخوازەل ملەتەیل ناو ئێران بوو.
چالاکەیل سیاسی و مەدەنی جوور پەخشان عەزیزی و وریشە مرادی ئەڕا «ژن و ژیان» کار و چالاکی کردنە، ئەڕا ئازادی و دمۆکراسی ک حەق گەل کوردە دکووشن، بڕیین سزاێ ئێعدام ڤەر ئی چالاکەیل سیاسی و مەدەنییە نیشان دێ ک ئی ڕژیمە قەسەم خواردێیە تاهەێ دژمن ژن و ژیان بوو، دژمن ئازادی و دمۆکراسی بوو.
ئەما زانیمن ک هۊچ دیکتاتور و ستەمکارێ ک دژمن ژن و ژیان و ئازادی بییە نەتۊنسێیە تاهەێ ڤەسەر پا بووسێ.
هەرچی تۊم ستەم و بێداد بکاڵی، دماخر نفرەت و مردن درەۊ کەری و گەنتر ئشکی و ئەژناو دچی.
ڕژیمەل دیکتاتور تۊنن ئەڕا ماوەێ کوڵێ ڤە هڕەشە و گرتن و زندان و ئێعدام دەنگ ناڕزایی خەڵک کەم بکەرن ئەما هەرگز نەێتۊنن خێیاڵ ئازادی، ئەڤین و ئشق ئازادی، ئارزوو دمۆکراسی و عداڵەت دەناو دڵ مەردم بکوشن.
پرسیار: بەرتەکەیل کوومەڵگەی ناودەوڵەتی وە فرەتر بیێن حوکمەیل ئێعدام لە ئێران چوی شیەو کەین؟ ئایا ئی بەرتەکەیلە کاریگەری وەرچەوێگ دێرید؟
ڕێوار ئاودانان : بێگومان هەر دەنگێ ک دژ ڤە ئێعدام و ڤەر پشتیڤانی ئەژ زندانییەل سیاسی و مەدەنی ناو ئێران بەرز بوو، پیرووز و ڤەنرخە. ئەما هاڵیم ئی ناڕزایەتیەیلە نەڕەسینە ئاستێ ک هەڤەجەس.
ئەگەر گەل ڤە یەکدەنگ پشتیڤانی ئەژ ڕووڵەیل خوەێ بکەرێ تۊنێ حکوومەت ناچار ڤە پاشەکێشە بکەرێ.
بێدەنگ مەنن دە ڤراوەر ستەم و دیکتاتوری نەتەنیا هۊچ سوودێ ڤەر کوومەڵگە نەێرێ، رژیم هارتر و دڕندەتر کەرێ و ژیان کوومەڵگە سەختترەو دوو.
ئازادیخوازەلێ جوور پەخشان و وریشە و زەینەب ک ئێمکە هانە ناو زندانەل رژیم، وە پاڤەگەزادن خوەێان نشان دن ک ڤە بێ ئازادی، ڤە بێ یەکسانی، ڤە بێ عداڵەت و دمۆکراسی هیچ کەس و هیچ ملەتێ نەێتۊنێ ژیان شەرافەتمەندانەێ باشتوو. ڤەسنگ یە گرەکە فرەتر بکووشێمن و فرەتر خەبات و مۆبارزە بکەرێمن.
پرسیار: وە لەوەرچەو گردن فشارەگان، جویلە و پویایی جمشتەیل ناڕەزایی لە ئێران چوی دوینید؟ حکومەتیش تا چەنێگ توانێد کونتروڵ کوومەڵگە لە سایەڕ فشارەیل ئقتسادی و سیاسی لە دەس داشتوید؟
ڕێوار ئاودانان : جمشتەیل ناڕزایی ناو ئێران، بەرزی و نزمیی فرەێ ڤە خوەێان دینە ئەما هۊچ ڤەختێگ لەناو نەچینە.
ڤە تایبەت جمشت «ژن ژیان ئازادی» یەێجوور رۆنسانس یا ڤەدییەتن نووێ بی ک مەردم ناو ئێران فرە ئاگامەنتر و ڤەهازتر کرد. فەرهەنگ و نووڕین تازەێ دەناو خەڵک دورس کرد ک مینێ و ڤە فشار و سەرکوت ئەژناو نەێچوو.
مەردم ئێران ئەژ هەر دەرفەتێ ڤەر نافەرمانیی مەدەنی ئستفادە کەرن. زانێمن ک جمشتەیل دمۆکراسیخوازیی مەردم ئێران هاڵێم تەسفییە حەساو دماین ڤەگەرد ڕژیم نەکردنە، ئەما بێگومان ئەو ڕووژە دێیاێ.
هەرچی فشار دەوڵەت ڤەسەر مەردم فرەتر بوو، ئەو تەسفیەحساوە قورستر دوو.
گەل کورد، ئەژ حەق ئازادیی خوەێ دەسئەڵگر نییە. بێلە کەس نەخوازێ ڤە فشار و جەنگ و کوشتن کوردەل بترسنێ، گەلێ ک ئشق و ئەوین ئازادی ها ناو دڵێ، ترس ئەژ مردن، دە ناخ خوەێ کوشتێیە.
گەلان ئێران و ڤەتایبەت گەل کورد هاز و درەقەت یە دێرن ک دووارە و دووارە جمشتێ جوور «ژن ژیان ئازادی» بخسنەۊ ڕێ. ڕژیم نەتۊنێ تاهەێ جمشتەیل مەردمی سەرکوت بکەرێ، دماخترێ دە ڤراوەر مەردم شەکەت دوو و ئەژ پا کەفێ.
پرسیار: هاتنەوەی ترامپ چ کاریگەرێگ لە بان سیاسەتەیل ناوخوەی و دەیشت ئێران دێرێد، نەقش دەولەتەیل ئرووپایی و چین لە ئی وارە چجوری شیەو کەین؟
ڕێوار ئاودانان : ئێران دخوەس وە ئی جەنگە ک ڤەگەرد ئسراییل کرد، ڤە دەس پڕ بچووە سەر میز مزاکرە ڤەگەرد ترامپ و ئمتیاز بگرێ. ئەما رژیم ئەسەد دە سووریە ئەژناو چی و یە بەرنامەێ ئێران شێڤەن و دەس ئێران کەمهاز کرد. ڕژیم ڤەر یە ک ئی کەمهازیی خوەێیە دە دەر جبران بکەرێ، خوازێ ڤە سەرکوت گەلان ئێران و گرتن و زندان و ئێعدام چاڵاکەیل مەدەنی و سیاسی، دیمەن ڤەهاز و درەقەتدارێ ئەژ خوەێ نشان ئامریکا و هاوپەیمانەلێ بێ.
حکوومەت ئێران دەی هەنزا خوازێ هەم جاێ خوەێ ڤلاێ چین و ڕووسیە بتەۊ بکەرێ و هەمیش خوازێ ڤەگەرد ئامریکا و ئرووپا سازش بکەرێ. کار فرە سەختێکە. ئەگەر خوەێ فرە نزیک یەێ لا بکەرێ، لایەن ترەک دێیایە گژ ئێران. ئەڵالە ک ئەردووغان و پانترکیسم، سووریە ئەژ چنگ ئێران درئاوردنە و دە قەفقاز و کوومار ئازەربایجان و ئراقیش گرووهەل داعشی – سەلەفیی فرەێ ئامادە کردنە، ئەژ لاێ تر دەناو خود ئێران بەش فرەترەک مەردم ئی ڕژیمە قەبوول نەێرن. ڤەسەنگ ئەشم وەز ئی حکوومەتە دە ئی ساڵ نووا فرە سەختەۊ دوو.
کوومار ئسڵامی ئێران چ هاوپەیمانی خوەێ ڤەگەرد ڕووسیە و چین قورستر بکەرێ و دریژە وە کێشمەکێش و جەنگ ڤەگەرد ئسراییل بێ یا ڤەگەرد ئامریکا و ترامپ سازش بکەرێ، چۆن هۊچ باوڕێ ڤە حقووق و ئازادییەل سیاسی و مەدەنی و دمۆکراسی نەێرێ، ڤەسنگ یە نەێتۊنێ گرفتەل و گیچەڵەل ناو ئێران چارەسەر بکەرێ.
پرسیار: وە لەوەرچەو گردن گشت ئی مەسئەلەیلە، ئێران لە ڕەوش ئێرنگەیی، چجوور توانید لە قەیران گشتگیر ناوخوەی و دەیشت ڕزگارێ بوود؟
ڕێوار ئاودانان : رژیم ئێران ئێمکە ها ژێر هەڕەشە و گورز ئسراییل و ناتۆ و پانتورکیسم، هیچ ڤە سوودێ نییە بخوازێ فشار فرەترێ بخسێیە سەر کوردەیل و بخوازێ چالاکەیل مەدەنی و سیاسی ئێعدام بکەرێ.
درەتن ئەژناو ئی هەمکە قەیران و گرفتە ڤەر ڕژیم فرە سەختە. چۆن فساد و ڕانتخواری و پشت گووش خسن داخواز مەردم دەناو کوومار ئسڵامی نەهادینە بییە. تەنیا ڕێی ڕژیم یەسە ک بڕیار بێ گووڕانکاری بنەڕەتی بکەرێ. ئەڤەێ ک ئمڕوو خوەێ نەگواڕنێ سۊ ڤە زوورەملێ گواڕننەێ.
ئێران ئەژ سیاسەت دژ ڤە کورد هۊچ دەسکەفتێ ڤە دەس نەێخسێ. گەرەک ئەڵجا ڤەگەرد کوردەل ئی مەسەڵە ڤە سیاسەت دمۆکراتیکێ چارەسەر بکەرێ. ڤەگەرنە دمینۆ ڕمیاێن دیکتاتۆریەل مەنتەقە ئەژ سەددام و بەشار ئەسەد، سەرەنجام ڤە ئێرانیش ڕەسێ.
دشمنی ڤەگەرد کورد و چارەسەریی دمۆکراتیک جوور یەسە ک پەل ژێر پاێ خوەت بۊڕی.
ئێمەێ کورد تا ئێمکە فرە کووشیاێمنە ک کێشەێ کورد ڤە ڕێی دیر ئەژ شەڕ و دیر ئەژ جەنگ دە رووژهەڵات کوردستان و ئێران چارەسەر بکەرێمن. چۆن نەێخوازێمن ئی جەنگ ماڵڤێرانکەرە ک دە سووریە و عراق و ڤڵاتەلێ تر هەس، ئێران و ڕووژهەڵات کوردستانیش بگرێیەڤەر و گەل خوەمان تیش کارەسات بێیاێ. نەێخوازێمن کرماشان و ئیلام و سنە و ئروومیە بوونە مەێدان جەنگ.
ڤەسنگ یە کوومار ئسڵامی مێیا پێناسە یا بازتەعریف تازەێ ئەژ کێشەێ کورد دە ئێران بکەرێ. ڤە ئنکار کردن و هەڕەشە هیچ گرفت و گیچەڵێ چارەسەر نێیەو.
گەل کورد دە دیار کردن چارەنڤیس سیاسیی مەنتەقەگە فرە نەقش دیارییێ دێرێ، ڤەسنگ یە کوومار ئسڵامی مێیا پێناسە یا بازتەعریف تازەێ ئەژ کێشەێ کورد دە ئێران بکەرێ. ڤە ئنکار کردن و هەڕەشە هیچ گرفت و گیچەڵێ چارەسەر نێیەو.
گەل کورد دە دیار کردن چارەنڤیس سیاسیی مەنتەقەگە فرە نەقش دیارییێ دێرێ، ڕژیم بەشار ئەسەد ئەگەر ڤەگەرد کوردەل ڕووژئاوا مەسەڵەێ خوەێ چارەسەر بکردا ئەژ یەک نەێچیچیا. ئێران بایس دەرس بگرێ و سیاسەت خوەێ دە ڤەراوەر کورد ئەژ بن بگواڕنێ.
کورد تۊنێ مشکڵەل خوەێ ڤەگەرد هەر لایەن، ڤتووێژ بکەرێ و ئامادەو. ئەما هەر لایەنێ ک بخوازێ ڤە زوان زوور و فاشیسم و ملهوڕی قسە بکەرێ، گەل کورد و جمشت ئازادیخوازیی کورد، سەخت دە ڤەراوەرێ هووسێ.
پاشخوان و جەواو کەسەیلێ جوور پەخشان و وریشە و زەینەب ک ئەڕا حەق و ئازادی ژن، ئەڕا یەکسانی و دمۆکراسی کووشیانە، سزاێ ئێعدام نییە. گەلێ ک خوازێ ڤە زوان و فەرهەنگ خوەێ بژییێ، ئازادنە دە ڤڵات و نیشتمان خوەێ بژییێ، حەقێ گرتن و زندان و دارداێن نییە.
ئەگەر رژیم ئێران جەواو بیچگترین داخواز ژنەیل و گەل کورد ڤە تن و تێژی بێ، باێس بزانێ ک خەڵک کوردیش ناچار دوو ڕێیەل ترەکێ ئەڵوژنێ ک هیچ هیچ ئەڕا ئی رژیمە خاس نیین. گرەکە زیتر ئی سزاێ دارداێن و ئێعدامە بنێ ئەۊلا.
خەڵک کورد و گشت گەلان ئێران نە تەسلیم دیکتاتوریی حکوومەت دوون و نە خوازن ڤڵاتێیان بووە مەیدان جەنگ بێگانەیل. چوون ک هیچ کامێیان چارەێ موشکڵەیل کوومەڵگە نییە. تەنیا ڕێی دورس ڤەر ئێمە، دریژە داێن ڤە خەبات و مۆبارزە و پشتڤەسن ڤە هاز و درەقەت خوەمانە.
دە ئی سەردەمە ک ڕووژهەڵاتناوڕاس یا خاوەرمیانە گواڕێ و ئەژ نوو بنیادێ دنن مێیا هەر دەوڵەت و لایەن سیاسی، دیار بکەرێ ک خوازێ ڤەگەرد کورد مشکڵەل خوەێ چارەسەر بکەرێ یا دژمنیی کوردەل بکەرێ. ئێمە هەمیشە خوەستێمنە کێشەێ کورد ڤە شێڤەێ سیاسی و دمۆکراتیک چارەسەر بوو، ئەما دە نوواێ ملهوڕی و ئانە ک هێرش بکەرنە سەر گەل کورد بێدەنگ نەێمینێمن.
هنوز نظری ثبت نشده است. شما اولین نظر را بنویسید.