ڕێوار ئاودانان
ڕژیم فاشیست ترکیە وە گرد هاز و توانای خوەێ دکووشێ خاک باشوور کوردستان داگیرەو بکەرێ. ئی ڕژیمە، داگیرکارییەیلێ لە ڕووژئاوا و سیاسەتەیل قڕکردن گەل کورد دە باکوور کوردستانیش بەردەوام کەێ. بەڵام ئامانج ڕژیم ترکیە لەی هێرش بەرفراوانە دە باشوور کوردستان و عەراق چەس؟ هەر ئیجوورە ک زانیمن ئاگر شەڕ گەورەێگ ک لە ناوچەگە و گشت جەهان ئەڵگریسیاێە، نەخشەێ ژیۆپۆلتیک دگوەڕنێ و ئەژم و سیماێ نووێک وە پێ دەێد. ڕژیم فاشیست ترکیە دخوازێ لەی شەڕە فرەترین بارە بووەێد و خوەێ بکەێ وە هاز باڵادەست (هەژمۆن) ناوچەگە. ڕژیم ترکیە وە پڕۆژەێ “ڕێ و گەشەسەنن” و کۆریدۆر بازرگانییێ ک بڕیارە ژە ئرووپا- ترکیە- مووسڵ- بەسرە تا خەلیج- قەتەر- ئمارات- هند بکێشرێ، وە پرۆژەێ “لاجەوەرد” ک کۆریدۆر ناوەێن ئەفغانستان- تورکەمەنستان- دەریاێ خەزەر- وڵات ئازەربایجان- گورجستان- ترکیەس ئوو کۆریدۆر زەنگەزوور لە قەقفاز، دخوازێ پرۆژەێ کۆریدۆرەیل بازرگانییێ ک بڕیار بییە ئەژ لایەن ئێران دورس بوون، پووچەڵ بکەێ. ئەگەر ترکیە بتۊەنێ ئی کارە وە ئەنجام بڕەسنێ، ئێران دکەفێیە پەراوێز و تۊش تاسیان ژیۆپۆلتیک کوشندەێگ دبێگ. ترکیه دخوازێ خوەێ بکەێ وە یەکمین هاز ڕووژهەڵات‌ناوڕاس و وڵات ئێران و گەلان ئێرانیش بخەێدە ژێر فشار خوەێ. پان‌ترکیسم قۊلیی ئستراتژیک خوەێ دە ناو خاک ئێران پێناسە کردێیە. ئەڕا یە، ترکیە دەناو هەر جوور پیلانێ ک دژ وە ئیران بوو جی گرێد. ئامانج ترکیە لە هێڕش وە سەر باشوور کوردستان یەسە ک زەمینەێ ئی کارە لە عەراق فەراهەم بکەرێ. وە ئی هێرشە هەم دخوازێ گەل کورد لە بەێن بوەێد و هەمیش پیلان نگریس خوەێ ئەڕا بیین وە یەکمین هاز ناوچەگە وە بن‌دورس بڕەسنێ.
حزب دمۆکرات و بنەماڵەێ بارزانی لە ئی داگیرکارییە وە چالاکانە ئەڕا ترکیە نووکەری دکەن. هەناێ ئیشێمن “بارزانی تا بن مل دە خێیانەت و دزەڕای چقیاێە”، بڕێک لە پانکوردەیل تووڕە دوون! بەڵام قسەێ ئیمە حەقیقەتێگە. ئەوان هێمان ژە جگاکاریی ناوەێن “کورد ئازاد” و “کورد ژێردەس” ئەونەێڕەسن! پ.ک.ک جمشت کوردەیل ئازادیخوازە. خێیانەت بارزانی و حزب دمۆکراتیش ئاشکاراس. پێشتر لەتێک ئەژ خاک باشوور کوردستان (کەرکووک، خانەقین و بەدەرە و مەنەلی و مەڵوەنەیل ترەک کوردەیل فەیلی) وە کردار بییەسە قوروانیی ڕانت‌خوەری و دەسڵاتخوازیی بنەماڵەێ گەندەڵ بارزانی. ئێمکەیش نسمەێ ترەک باشوور کوردستان لە لایەن بارزانی پێشکەش ڕژیم ترکیەێ فاشیست دکرێ. هەر ئەوجوورە ک شەنگال لە لایەن بارزانی وە داعش پێشکەش کریا، ئیسە گشت خاک باشوور کوردستان و ناوچەیل هاوسنوور وەگەرد ڕووژهەڵات کوردستانیش وە ترکیەێ فاشیست پێشکەش دکرێ تا ئەردووغان بتۊەنێ ئەو کۆریدۆرە ک تواێد، تا بەسرە بوەێد.
داگیرکاریی سپاێ ترکیە و خێیانەت بارزانی دژ وە کوردەیل، بێجەژ باشوور کوردستان ئەڕا ڕووژهەڵات کوردستان و ئێرانیش گەپترین مەترسییە. وەسنگ یە ک ڕژیم فاشیست ترکیە، تواێد چەتەیل چەکدارێگ جوور داعش، سەلەفیییەگان و ئخوانییەیل ک هاوپەیمان ئەردووغانن لە سنوورەیل ڕووژهەڵات کوردستان و ئێران جیگیر بکەێ. یە هەڕەشەێ گەوراێکە وە سەر هەبوون گەل کورد ک گرەکە بۊچگ نەوینێمنەێ. ڕژیم فاشیست ترکیە ک تەنانەت وە دارەزەیتوونەیل عەفرین و داربەڕۊەگان زاگروس بەزەیێ نیەتێد، ئەڕا یە ک وە خەون و خەێاڵەیل خوەێ بڕەسێ، وە گشت هاز خوەێ ها وەشوون قڕکردن کوردەیل و سڕیین کوردستان ژە نەخشەێ ڕووژهەڵات‌ناوڕاس بانان. تەنیا جمشتێ ک دە وەردەم ئی مەترسی و فاشیسمە وسیاێە، پ.ک.ک و گەریلایل ئازادیخوازێین. وەسنگەێ یە، پشتیوانیکردن لە پ.ک.ک ئەڕا هەر کورد ئازادیخواز و گشت کوردستان، باوەت فرە ژیانی و چارەنڤیس‌سازێکە. پ.ک.ک بەرژەوەندیی گرد کوردەیل دە هەر چوارپارچەێ کوردستان پاراستە کەرێ. پاوەگەزدان پ.ک.ک دە وەراوەر هێرشەیل سپاێ داگیرکەر ترکیە، ئەڕا پاراستەکردن هەبوون، ئازادی و بانان سیاسیی کوردەیل ڕووژهەڵات کوردستان و گەلان ترەک ئێرانیش فرە بایەخدارە. پ.ک.ک وە ڕووحیەێ بەرز نیشتمانپەروەری و ئازادیخوازی لە وەراوەر سپاێ داگیرکەر ترکیە وساێە و بێ‌گومان گەریلایل ئاپۆیی، دەرس دیرووکیێگ وە پان‌ترکیسم و ئەردووغان دەن و خەێالەیلێ دەنە دەم واێ.
هنوز نظری ثبت نشده است. شما اولین نظر را بنویسید.